Ynstjoert: FNP Noardeast-Fryslân: Lit mienskipsfoarsjennings oanslute by de OVEF

NOARDEAST-FRYSLÂN – Op 16 sept. is yn ‘e Algemene ledegearkomst fan de OVEF (Koöperaasje Iepenbiere Ferljochting & Enerzjy Fryslân U.A.) besletten om it enerzjykontrakt mei Gazprom net op te sizzen.

Dat betsjut foar de leden fan de OVEF (wêrûnder de gemeente Noardeast-Fryslan) dat it geunstige enerzjytaryf bliuwt sa as it no is. Omdat der in protte mienskipsfoarsjennings binne dy’t no te krijen ha mei hege enerzjyrekkens en dêrtroch miskien yn ‘e knipe komme tsjinnet de FNP Noardeast-Fryslân in moasje yn ‘e mande mei S!N, GB, BVNL, PVDA, VVD en CDA yn. De moasje ropt op om op koarte termyn mei de OVEF te praten oer de mooglikheden om dy foarsjennings fia de gemeente ûnder te bringen by it kontrakt fan de OVEF.

OVEF

Fryske gemeenten kinne enerzjy ynkeapje fia de OVEF. De OVEF (Koöperaasje Iepenbiere Ferljochting & Enerzjy Fryslân U.A.) fersoarget fanâlds de ynkeap fan enerzjy en it duorsum meitsjen dêrfan foar har leden en ôfnimmers. Njonken de gemeenten binne oare ôfnimmers û.o. stiftingen, it Frysk Museum en Tresoar. Foardiel fan ôfnimmer wêze by de OVEF is dat der skerp ynkocht wurdt en dêrnjonken wurdt de ôfnimmer meinommen yn it proses fan duorsum meitsjen. FNP Noardeast-Fryslân wol û.o. dat der ek mooglikheden komme foar doarpshuzen, biblioteken, sportferienings en oare mienskipsfoarsjennings om harren oan te sluten by de OVEF.

• Facebook
• Twitter
• Linkedin
• Whatsapp
• Whatsapp
• Mail