In protte wille yn ‘e Trieme mei Toanielploech ‘Noflik tegearre’

DE TRIEME  – Toanielploech ‘Noflik Tegearre’ fan de Trieme/Kollumersweach spile saterdeijûne de klucht “Yn ‘e Prizen” foar in goed fulde seal yn de Bazuin op ‘e Trieme. It is in komeedzje fan Henk Sloots.

Oan de wille dy’t de taskogers hiene wie ôf te lezen dat it stik bot oanspruts. De spilers wienen goed op dreef en foelen fan de iene yn de oare hilarische situaasje.

Geart en Berta Bonkema hienen yn harren strjitte mei de postkoadelotterij de strjitpriis wûn. Yn dizze komeedzje doart Geart Berta net te fertellen dat er fergetten is har op te jaan foar de lotterij. En se jout al hiel wat jild út oan bygelyks in reis nei Ibiza en in nije badkeamer. Kobus “krekt” Kerkstra, de oannimmer, is al drok oan de gong mei de badkeamer. No moat er sa gau mooglik jild krije fansels. As Berta har muoike – in rike widdo (mei har hûntsje Pinky, wer’t se hiel wiis mei is) op besite komt, sjocht Geart syn kâns. Hy freget syn buorman Piter him te helpen. Mar Sjouk – de frou fan Piter – smyt hieltyd roet yn it iten, sûnder dat se der erch yn hat.

Nijskjirrrig wurden hoe’t dit ôfrûn is? De ploech spilet freedtejûn 27 jannewaris yn Old Dutch yn de Westereen en saterdei 28 jannewaris yn de Trije Doarpen op ‘e Sweach en 3 febrewaris yn de Nije Warf yn Wâlterswâld. Oanfang 20 oere. In protte wille yn ‘e Trieme mei Toanielploech ‘Noflik tegearre’

• Facebook
• Twitter
• Linkedin
• Whatsapp
• Whatsapp
• Mail